Ke Kaʻao Hōʻoniua Puʻuwai No Kamiki
...Kāhea a‘ela ke kupuna wahine i kekahi mo‘opuna āna, iā Kamiki. A kū a‘ela nō ho‘i ‘o Kamiki a mālo‘elo‘e ke kino, a pololei nō ho‘i ke kū ‘ana, hou nā lima i mua me he A‘u ala e kīpoho ana e kiko i ka i‘a, ‘o ia ka wā i pane mai ai ke kupuna wahine: “E Kamiki, e ki‘i ‘oe i ka wai a Kāne, aia lā i luna o ka piko o ke kuahiwi i ka hālau ali‘i o Poliʻahu a me Lilinoe me ka hānai a lāua ‘o Kapikoʻowaiʻau. Aia ma lalo o ka paepae o ka Pōhakuakāne e nānā ihola iā Pōhakuloa. ‘O ka ‘ohana ia o ko makua kāne. E ki‘i ‘oe i wai no ka ‘awa o ‘olua, a ‘o ko kaikua‘ana ke ki‘i i ka ‘awa i ka pali ‘o Waipi‘o. ‘O ko māmā a pau e ku‘u mo‘opuna, ho‘oku‘u ‘ia, kīko‘okoʻo ‘ia, ho‘olawalawa ‘ia, ho‘omohala ‘ia.
E holo ‘olua a hiki i mua o kekahi kupuna wahine o ‘olua, aia lā i ke anu, i ka hei, i ka mānomāno wai, i ka lā‘au kala‘ihi ʻō‘ō i ka nahele ‘o Mahiki ē. ‘O ka inoa o kēia kupuna wahine ‘o Lanikuʻiamamao, a ‘o Lanimamao nō ho‘i. Aia iā ia ke kānoa a me ka mau‘u o ka ‘awa. A me ia kānoa ‘oe e ukuhi ai i ka wai kapu a Kāne mā lāua ‘o Kanaloa, a hi‘i a‘e i ko poli a huli ho‘i mai ... |
"Pō‘ai a‘e ‘oe i ka hānai a nā ali‘i wahine a Poliʻahu lāua ‘o Lilinoe iā Kapikokapuʻowaiʻau, a ki‘ei iho i kini o kākou e kia‘i ala i ka wai kapu a Kāne mā, a nānā pū aʻe ʻoe i ka wai ʻauwai a lākou e ʻeli ala ..."
... I ka ‘ōʻili ‘ana o Kamiki e lele, pupuʻu a hoʻolei loa, e kīʻoʻe ana kēia i ka wai kapu a Kāne i loko o ke kānoa i kapa ‘ia ‘o Hōkūʻula. A ia wā i ‘ike mai ai nā wahi akua kiaʻi i ka ʻale o ka wai a hū aʻela ma waho o ka pūnāwai. Iā lāua i holo mai ai, ʻike lāua i ka māʻalo o ke aka a nalo akula. A ua kapa ‘ia ka inoa o kēlā pūnāwai ‘o “Ka Wai Hū a Kāne,” a hiki i kēia lā, no ka hū ‘ana i ke kīʻoʻe ‘ana a Kamiki i ka wai i loko o ke kānoa ‘awa o ke akua. Holo akula ʻo Kamiki a kiʻei akula i ke kula ʻo Waikoloa no ka nānā ‘ana i ke kaikuaʻana iā Makaʻiole, a ‘ike akula ʻo ia ma ke alo iho o nā puʻu ‘o Holoholokū i loko o ke ehu pōhina o ka lepo e kāhili ‘ia maila e ka Waikōloa, a ‘o ia kona wā i huli aʻe ai a holo ma luna o nā puʻu, a ʻale aʻela ka wai a maninini ihola. A kahe akula a kiʻo a lilo i pūnāwai. Kapa ʻia ka pūnāwai, ‘o Waikiʻi a hiki i kēia lā no ke kiʻi ʻana o Kamiki i ka wai hū a Kāne i ka paepae kapu o ka Pōhakuakāne, e puaʻi ala i ke kumu o ka pali o ke kuahiwi ‘o Maunakea ... |