Nā Huakaʻi Aliʻi O Maunakea
Mea hou o ke alo Aliʻi
I ke ahiahi Poʻakahi iho nei, ua holo aku ke aliʻi Mrs. Kamakaʻeha Dominis me kona kaikaina aliʻi Likelike ma luna o ka mokuahi Kīlauea i Hawaiʻi. E pae ana lākou ma Kawaihae, a ma Waimea e hele aku ai a hala loa aku i ka papa holuholu o Wailuku. Aloha wale ko lākou ʻike ʻana'ku i ka hau anu o Maunakea. A i ka ua Kīpuʻupuʻu o Waimea. KA NŪPEPA KŪʻOKOʻA, 22 IUNE 1865 |
EMMA KALELEONĀLANI MA KOHALA
Ma ka Poʻalima o ka pule i hala, ua mālama ʻia he papaʻaina nui ma Hālawa, ma ka hale noho o H. Hook, no ka Mōʻīwahine Emma Kaleleonālani, a ma hoe o nā hoʻohialaʻai ʻana, ua kāmoe akula ka huakaʻi aliʻi ma ia ʻano liʻulā a moe ma ia pō ma ka home noho o James Kāʻai. Ua nui nā hoʻohiwahiwa a nā makaʻāinana o ia ʻāpana ma ia pō. Ma ka Poʻaono aʻe ua moe ma kahi o J. Kekipi, ʻelua lā ma ia wahi, a ma ka Poʻalua aʻe, ua kāmoe hou ka huakaʻi aliʻi, a moe ma kahi o Kamauoha ʻōpio. Ma ia pō, ua hāʻawi ʻia he papaʻaina nui loa i hiki aku ka huina nui o nā $1,000 e kekahi mau keiki lalawaiʻa o ia ʻāpana. Ma ka Poʻakolu aʻe, ua kāmoe hou ka huakaʻi aliʻi no Waimea, a hōʻoluʻolu ma ia pō ma ka home noho o J. Parker. Ma ka ʻauinalā Poʻahā, ua hele hou ka huakaʻi no ka mauna, a moe ma Mānā, ma kekahi lā hoʻi hou no kai o Waimea, a no kahi lā aʻe, kāmoe hou ka huakaʻi no Waiʻau, ma ka mauna. He ʻoluʻolu ke ola o ke aliʻi, a me nā hoa hele, ua hui pū kēia huakaʻi aliʻi me ke kama aliʻi Likelike, ma kēia huakaʻi mākaʻikaʻi. KA NŪPEPA KŪʻOKOA, 14 ʻOkakopa 1882 |